Rianxo

Pois que hoxe é o “Blog Day”. Foi no 2005 cando Nir Ofir, un israelí que decidiu que no mundo de globalización no que vivimos había que ter un día adicado aos diarios da rede. E a súa proposta era que en cada bitácora se fixera referencia a outras cinco, e que recomendaxe ós seus lectores. Pois únome:

Blog de Paula García. Pois é o blog dunha veciña, unha rapaza de 9 anos de Boiro. Empezou a súa andanza en xaneiro deste ano.

A mis 95 años. María Amelia muxiana de 95 anos, é a avoa galega blogueira. Ten historias para contar, e dende decembro do 2006 xa debe levar feitas un cento de entrevistas para medios de todo o mundo. Felicidades, que dende fai uns días xa é bisavoa.

La Huella Digital. Mellor blogue en español do ano 2006. Nacho de la Fuente é un periodista coruñés, que nos fala da actualidade. Dende que empezou en xaneiro de 2005, leva publicados máis de 1.800 entradas, case nada.

Trebellos. Blogue adicado ós gachets, cachibaches, chismes, aparatos que a algúns moito nos apasionan. Hai centos de blogues adicados a isto pero iste está feito na nosa lingua, en galego.

Chuza!. Realmente non é un blogue, é un espazo adicado a novas galegas, onde calquera pode enviar historias, e somos os navegantes os que as chuzamos, valoramos, decidindo así se saen na primeira páxina.

Pois aquí vos quedan as miñas recomendacións. Case non chego a tempo.

Aí vos vai o vídeo máis visto do Youtube dende que arrincaron en febreiro de 2005.

Anda que non se montou polémica sobor do hino galego nas galescolas. Pasa o de sempre, se un quere atopar problemas, acabaos atopando. Desputas a un lado, a letra é dun poema de Eduardo Pondal e a música de Pascual Veiga. Escoitao:

(Actualizado: no Explorer non funciona, pero si co Firefox.)

Fai xa dous anos e medio, alá polo xaneiro de 2005, que un guindastre retirou a escultura de Asorey coa escusa de que podía vir abaixo. As obras no Dique remataron xa fai moito tempo, e a balconada segue valeira. ¿Por canto tempo?

I é que xa se vía vir. Uns fortes temporais ao longo de varios invernos, provocaron o derrube de parte das paredes nas que se apoian os xardíns do Pazo de Baltar, así como tamén do camiño que levaba dende Quenxo até Tanxil. Isto provocou que a familia Baltar reclamase que se arranxaran eses destrozos que afectaban ás súas propiedades, pero estes non se producían, a guerra xa estaba armada. No inverno de 2004, gran parte da base de pedra na que se apoiaba a Virxe, viuse a baixo, e certo é que a estatua corría perigo. Os Baltar decidiron retirala, e aproveitaron para anunciar que ademais ían facerlle unha restauración. A día de hoxe os rianxeir@s seguemos sen coñecer o paradeiro da Rianxeira.

E todo indica que estas diferencias entre administracións e a familia Baltar, vai para longo, pois agora hai que engadirlle a posible expropiación da casa de Castelao (propiedade dos Baltar), que ven de anunciarse nos pasados días.

E a Virxe de Guadalupe estase empregando coma medida de presión, entre as xa, moitas diferencias de ambas partes. Como os fillos nas separacións dos pais.

Outro ano máis chegará a procesión marítima da Guadalupe, e a tradicional paradiña entre as dúas irmás non se repetirá por terceiro ano consecutivo.

Tamén e destacable o “I Certame de Música Tradicional”. Nesa sección poderedes comprobar as bases para o concurso, así como as partituras e as cancións de carácter obrigatorio do certame. Por certo cancións que ó igual que en “Radio Blogaliza”, están en formato .ogg (libre, por moito que ós da SGAE lle pese).

Na web tamén temos a opción de descargar os “Libros de Festas”, dende o deste ano que corre, até o do ano 2002, incluíndo o libro especial do 150 aniversario das Festas de Guadalupe de Rianxo, que se cumpriu fai tres anos.

Coma cousa curiosa gustaríame destacar que tras un ano de “desterro” a orquestra París de Noia volve a actuar na Guadalupe. Para os que non se lembren, fai dous anos tocoulles facer o “Fin de Festa”, e o que fixeron foi marchar antes de tempo, e iso á xente non lle gustou nada. Si algo caracteriza ás festas da Guadalupe de Rianxo, son eses intres finais de cada día, nos que a praza está chea de xente, e se a orquestra non se anima, xa sabedes: “Po ano non volvedes!!!!!”. Nin os romanos no Coliseum.

Seguir lendo…

Dende fai xa tempo deixei de ser asiduo lector de “La Voz de Galicia”, e agora nada máis que me achego a súa web cando teño algo de tempo. I é que as continuas meteduras de pata á hora de transmitir as novas, ás veces roldan o absurdo. Vale que poidan trabucarse, que non dean ven os datos dos lugares por descoñecemento, que cheguen a dar novas de acontecementos despois de que estes xa se produzan, en fin, cousas que ó mellor poderían ser “pasables” nun xornal de segunda.

Pero o que non pode ser de recibo, é que na edición do Barbanza, neste titular, afírmese que o programa músico-cultural “Vai de Camiño” comezará na comarca este fin de semana. Cando o pasado sábado 28 de xullo, como se pode ver no programa de actuacións, estiveron en Rianxo (que pertence ó Barbanza), a orquestra folk “Son de Seu”. Por favor, lede o artigo enteiro que non ten desperdicio.

E por certo xa postos a informar, en Boiro ademais de Susana Seivane, estará Emilio Rúa, cantautor do concello de Riós. E o domingo na Pobra estarán “Ruxe Ruxe” e “Dios k te Crew”, que ó xornalista esquecéuselle escribilo.

E se alguén coñece ó redactor, xa que o artigo non ven firmado, que lle explique a diferencia entre “oír” e “escoitar”.

Fai agora un mes que escribín “Xa vai sendo hora”, onde falaba sobre o polígono industrial, en relación ás novas aparecidas naquel día de que xa so quedaba un informe de Política Territorial, para que o parque tivera luz verde. Pois hoxe na Voz de Galicia dentro dunha serie de novas relacionadas cos parques empresariais na comarca, publícase unha pequena nota onde se afirma que o alcalde comenta que xa se dispón do informe de impacto ambiental a favor, e que agora ten que ser remitido á Dirección Xeral de Urbanismo e ó Consello da Xunta para a súa aprobación definitiva. Pero imos a ver, ese informe leva feito dende fai máis de un mes e aínda non foi enviado??

Seguimos a quedarnos atrás. ¿Pero como se pode afirmar que en tres meses xa vai estar case todo o chan vendido, se todavía non se pode empezar a construír? ¿Acaso as empresas van esperar a que o polígono de Té estea feito dentro de sabe dios cando, mentres nos concellos veciños teñen chan listo para edificar?. En Catoira inaugurouse un parque empresarial fai pouco máis de quince días, en Boiro fai unha semana que se adxudicou a construción da segunda fase de Espiñeira.

Seguir lendo…